Phili 2 | MEU | STEP | Taunabunai, Keriso ena lalo-hakeru bema mia, uraheni ena tauhalo bema mia, Lauma ena hetura-heheni bema mia, hebogahisi bona hekaha bema mia,

Philippians 2

Ba maino

1 Taunabunai, Keriso ena lalo-hakeru bema mia, uraheni ena tauhalo bema mia, Lauma ena hetura-heheni bema mia, hebogahisi bona hekaha bema mia, 2 umui ese egu moale boma haḡuḡurua, lalomui boma hatamona, emui ura heni boma hatamona, emui lalo-hadai boma hatamona. 3 Ḡau ta basio karaia heiri-heiri dainai eiava hekokoroku dainai; a ta ta sibomui ba hahemanau, bamomui ba imodaidia. 4 Bona ta ta ena namo ena namo basio tahu, a bamomui edia namo ba tahu. 5 Keriso Iesu lalonai e miava darana umui lalomui ai danu baine mia. 6 Ia hari, ena be Dirava anitarana e abia, ena be ia Dirava ida vada e heḡereḡere, to se haeroa una na baine Dogoa tao ḡauna. 7 Ia ese sibona e hekaruhia hebubu, hesiai merona anitarana e abia, taunimanima oromana ai e vara, 8 ita-itana na taunimanima na heto. Bena sibona e hahemanau, Dirava e kamonai henia ela bona mase, oibe, satauro ena mase. 9 Una dainai Dirava ese e imodaia, lada ta e henia, lada iboudiai e hereadia ladana; 10 bena Iesu ladana dainai guba ḡaudia bona tanobada ḡaudia bona tanobada henuna ḡaudia iboudiai tuidia bae hadai; 11 bona mala iboudiai ese Keriso na “Lohiabada” bae gwauraia, Tamada Dirava iheatolaina.

12 Egu lalokau taumui e, nega idoidiai lau vairagu ai o kamonai henigu; harihari, lau murigu ai, emui kamonai ba habadaia, mai garimui bona mai heude-heudemui ida ihamaurimui ba tahua. 13 Badina be Dirava ese ena ura namodia iura-henidia bona ikaradia na lalomui ai e havaramu. 14 Ḡau iboudiai asi emui maumau asi emui hepapahuahu ba kara; 15 unu amo Dirava natuna ai baola, asi toutoumui, asi bebeka-bebekamui, bona asi emui kerere, uru gageva-gagevana mai gwau-edeedena bogaraginai. Idia padadiai ba hedinarai, tanobada ena diari na heto. 16 Mauri herevana ba hahedinaraia, bena Keriso ena dina ai lau na do baina moale, bainato “Asina heau kava, asina hekwarahi kava”. 17 Ena be lau raragu baine hebubu, emui abidadama karadia ihahelaḡadia, to baina moale, bona baita moale hebou; 18 umui danu ba moale bona baita moale hebou.

Timoteo baina siaia vasi

19 Lohiabada Iesu lalonai na laloamu asi vanahana Timoteo baina siaia vasi, bena harimui baina kamonai, lalogu baine keru. 20 Badina be dekegu ai ta lasi ia heḡereḡerena; ta lasi umui baine reḡumui ia baine reḡumui heḡereḡerena. 21 Badina be iboudiai na sibodia edia ḡau e tahumu, a Iesu Keriso ena ḡau asie tahumu. 22 A ia toana be dibamui: mero ese tamana isiaina e lao henimu na heto, ia ese lau isiaigu vada e lao heni, sivarai namo dainai. 23 Taunabunai egu helaro be asi vanahana ia baina siaia vasi, lau ede baina heto baina diba negana ai. 24 A Lohiabada na abidadama heniamu, nega basine daudau lau danu baina vasi.

Epafrodito be vasimu

25 Lau na tomamu tadigu Epafrodito, ḡaukara ai bona tuari ai e bamogumu tauna, o siaia egu dabu ai baine kahagu tauna, ma aina siaia vasi. 26 Badina be e lalomui badamu, bona lalona e hekwarahimu, ena gorere harina o kamonai dainai. 27 Momokani e gorerea, mokona e mase, to Dirava ese e bogaia hisi, bona dia ia mo a lau danu e bogagu hisi, egu lalo-hisihisi baine bada herea na garina. 28 Una dainai aina siaia vasi na tomamu. Ba itaia lou, bena ba moale; lau danu egu daradara baine maraḡi. 29 Benaini, Lohiabada lalonai bavabia dae mai moalemui ida; bona kara unuhetomadia e karamu na taudia danu iboudiai ba matauraidia. 30 Badina be Keriso ena ḡaukara dainai mokona e mase; ena mauri e dadaraia, emui hebogahisi egu ai baine haḡuḡurua totona.